Инечинь вастома

Инечинь васенце чистэ Бугурусланонь буень Сапожкина велесэ ( Самарань ёнкс) эрси истямо кой. Велень тейтертне эсь юткстост весемеде паро тейтеренть мазыйстэ оршавсызь. Те ули "Инечи" Сон туи велеушов чилисема пелев ды козоньгак кекши. Лия тейтертне моразь сыргить велеванть "Инечинть" вастомо. Мартост саить пия ведра. Молемстэ морыть:

Тейтерь-какат, тейтерь-эйдть,

Боярават, азравкат,

Мезень коряс минь сынек,

Мезе тезэнь пурнымизь?

Сень коряс ней минь сынек,

Се ней минек пурнымизь,

Пурнавинек тейтерь-эйдть,

Минь Инечинь учомо,

Мазычинень вастомо.

Коёндо сы Инечись,

Коёндо сы мазычись?

Чилисема сон ёндо,

Инешкипазонть пельде.

Мазыйнестэ наряжазь,

Парынестэ сон пурназь.

Сы сон ашо палясо,

Паля ланга руцясо,

Сы сон парцей пацясо,

Пулопесэ лентазо.

Кецякавтсы веленек,

Мазылгавтсы кужонок.

Веленть песэ пия ведранть путсызь мода лангс, ушодыть эряза моро:

Сак, сак, Инечи!

Сак, сак, мазычи!

Нишкепазонть тейтерезэ,

Верепазонть кучовксозо.

Вана ведра пиянок,

Пештезь пия плошканок.

Сюконятам пильгезэть,

Симдятадызь пиядо,

Кедьпезэнек сайтядызь,

Велезэнек вийтядызь,

Сисем чинеть кирдтядызь,

Кавксоцестэ ильтядызь -

Таго пиже лугава,

Мазый цеця юткова.

"Инечись" лиси каршост. Ансяк несызь, пиянть марто сыргить каршозонзо ды морыть:

Адядоя, тейтерь-эйдть,

Инечинек неяви.

Адядоя, азравкат,

Мазычинек редяви.

Каршозонзо листяно,

Пия плошка кандтано,

Пильгезэнзэ пратано.

Мазый моро моратано,

Кедьпезэнек сайсынек,

Велезэнек вийсынек,

Кецякавтсы веленек,

Мазылгавтсы кужонок.

"Инечинтень" кандыть пия кече ды весе сюконить пульзядо ЭРЗЯНЬ коень коряс ( вить пильгенть венстясызь удалов, пульзить, те кумажась тееви седе ало кершенть коряс, но модас ялатеке а токавтови) ды морыть:

Бояравась Инечи,

Азорава, азравка,

Нишкепазонть кучовтке,

Верепазонть вечкима,

Пазонть пельде кучозят,

Сисем чинеть нолдазят

Мастор ланга якамо,

Пуринеде симеме,

Ирець пирянь саеме,

Мазый моронь морамо.

Неикая сюкпрянок,

Симик пия плошканок,

Кедьпезэнек кундака,

Велезэнек адяка,

Мазылгавтык веленек

Кецялгавтык кужонок.

"Инечись" симсы пия кеченть. Тейтертне кундыть кедте кедьс ды велявтыть мекев велев, сынсь морыть:

Веле-сядо кенярдодо!

Вана сась ней учовксонок,

Киштезь-моразь минь вастынек,

Кедьбенеде минь кундынек,

Минь велес-сядс ней ветинек,

Кеняргавтсы сон веленек,

Мазылгавтсы сон кужонок,

Чилисема ёндо сась сон,

Чивалгомав таго туи

Пиже мазый сон лугава,

Мазый цеця сон юткова.

Инечинь таргонть перть тейтертне истя оймсить ды "Инечинть" марто якить кудосто кудос. Инечиде мейле таргочистэ (недлячистэ) "Инечинть" ливтьсызь.

Х. Паасоненэнь сёрмадовкстнэнь коряс печатьс "Чилисема" журналонтень анокстызе Маризь Кемаль

 

 
 
27.05.2018
 О стремительной деградации образования и не только
16.05.2018
 Тормозные колодки развития
13.05.2018
 ПИСЬМО ОТ УЧАСТНИКОВ ЭРЗЯНЬ КЕЛЕНЬ ЧИ
31.03.2018
  Размышления об извечном. Часть III
25.03.2018
  Размышления об извечном. Часть II

<<   июнь 2018    >>
Пн Вт Ср Чт Пт Сб Вс
 
 
 
 
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
 


Эрзянь ки. Культурно-образовательный портал. 2008

Литературный сайт Эрзиана  Аштема-Кудо, эрзянский форум    Меряния - Мерянь Мастор  


Flag Counter